اصعب سؤال الي جوابه للأسف مثله سؤال
ماهو تفلسف الا موقف صار واسمع ثاني بيت
البارحه يومه سأل وش ذكرك ذيك الليال..!!
كان الجواب بكل بساطه من متى اصلا نسيت..!؟
ادري بأن جمع الصعوبه والبساطه شي محال
لكنها صارت كذا......والي اهم اني دريت
ان الحياه فـ بعد احبابك اذا جف الوصال
تعيشها وتقتنع انك خلاص اصبحت ميَت
ياصاحبي لو كل شي يمر بالخاطر يقال
ماكانت العبره اتولدني ليا منك طريت
شفني قدرت احبس دموعي بس دمع القاف سال
وياكبرها ساكت ولكن داخل اوراقي بكيت
عمر الحكي ماكان دافي لبتدا بقولة تعال
لجل اتجاهل رجفت حروفي ليا مني حكيت
الحال في بعدك قسم بالله ماسميه حال
انوي على الضحكه واحس كلي خطى لني نويت
تصور انك من رحلت اشوفك لجسمي ضلال
لشفته امشي ببتعد واثره معي مهما مشيت
مدام يعني في بحرك لفرحتي مليون جال
وشفيه موجك ماركد قربت اموت وما رسيت
يرضيك ماعادت معي تفرق اذا جالك مجال
لاني اقتنعت انك نهايه واني ببطي مابديت
صرت اعقد حجاجي اذا جابوك بطراف الجدال
وانا قبل لا قالوا اسمك كني ميت ثم حييت
تعبت اعيش الدور وافتح للمعاذير الخيال
واتخيل اني جيت في بالك وانك استحيت
وترد لي كلك وله وتقول كن البعد طال
ومن الفرح ماعاتبك واقول ياخي مابغيت
حتى وانا اتخيل حشمتك لان قلبي لايزال
يكرر اسمك داخل اعماقي بنبضه لاسهيت
قلي شسوي فيك وانت بداخلي اصدق مثال
للحب واحساس القصيد من عانق الليل وسريت
ربي يصبرني على الفرقا مدام الحظ مال
وانت بيجيلك يوم وتعرف ليه في بعدك شكيت
واذا بلاك الله وعذبك اشتياقك بس تعال
واقرا القصايد في غيابك كل ابوها بيت بيت
وتدري ان اصعب سؤال الي يجي رده سؤال...!!
لا قلت لي وش ذكرك ثم قلت لك متى نسيت..!؟
محمد جارالله السهلي
من اجمل ماسمعت
تحياتي
